Innspel til Strategisk Næringsplan 2025-2033: Lokale handverkstradisjonar og matprodukt

I dag

Gloppen er eit levande samfunn med eit rikt mangfald av handverk og produksjonar. I bygdene våre vert det produsert ei rekkje matvarer som vert selde på ulike måtar, frå Bondens Marknad (Reko-ringen) til lokale butikkar og direkte sal på produksjonsstadene.

Handverksproduksjonen i kommunen vår er også imponerande variert. Vi har dyktige handverkarar som driv med dreiing, strikking, veving og sveiping. Vi har bunadssyersker, gullsmedar som lagar bunadssølv, og båtbyggjarar som tek vare på tradisjonen med Nordfjordfæringen. I tillegg har vi ein stolt tradisjon med felebygging, ivareteken av dyktige felebyggjarar.

Ved å synleggjere desse produksjonane og handverka, bidreg vi til eit meir levande og spennande sentrum.

Synleggjering av lokale handverk og matproduksjonar for besøkande og turistar

Her er nokre eksempel:

• Bakar Jon på Byrkjelo: Ikkje berre får vi smake på dei deilige bakarvarene, men vi kan også sjå handverket i aksjon gjennom glasveggen i bakeriet.
• Oselvarsenteret på Osøyra: Produksjonen av Oselvaren, ein tradisjonell sørvestlandsbåt, føregår midt i Os sentrum. Ein glasvegg gir turistar og besøkande innsyn i produksjonen.
• Husfliden i Sogndal: Her kan ein sjå korleis Sognebunaden vert til, då produksjonsborda vender ut mot gata.
• Intersport på Sandane: Sykkelreparasjon og skimontering skjer i eit ope rom, slik at ein kan følgje med på arbeidet.
• Gullsmeden i Øvregata: Verkstaden og produksjonen er synleg frå gata, noko som skapar ein spennande og aktiv fasade.

Korleis kan den Strategiske Næringsplanen bidra til å stimulere og legge til rette for at dei lokale produksjonane og handverka i Gloppen vert synleggjorde og tilgjengelege i sentrum av Fjordlandsbyen vår? På denne måten kan vi gjere sentrum levande og interessant for tilreisande av alle slag.