Innspel til Strategisk Næringsplan: Cruise

Ein berekraftig og verdiskapande cruisestrategi
Cruiseturismen er ein aukande del av reiselivet globalt, og Gloppen har eit unikt høve til å posisjonere seg som ein attraktiv, men samtidig berekraftig destinasjon. Cruiseindustrien er mangfaldig – med store variasjonar i passasjertal, miljøavtrykk og økonomisk potensial. For at Gloppen skal kunne ta del i denne marknaden, må det skje på eigne premissar, der cruiseturismen skapar reell lokal verdiskaping utan å auke belastninga på infrastruktur og miljø.

For Gloppen kommune er det viktig å gå utover ei enkel «ja» eller «nei»-halding til cruise, og i staden utvikle ein målretta og berekraftig strategi for cruiseanløp som kan bidra positivt til lokalsamfunnet. Kommunen har eit stort potensial til å bli ein attraktiv cruisedestinasjon, særleg for mindre og meir eksklusive skip. For å nå dette målet, må Gloppen ta styringa og sette klare krav som sikrar både miljømessig berekraft og lokal verdiskaping.

Strategiske hovudpunkt for cruiseturisme i Gloppen:

1.      Rett type cruise – ikkje berre meir cruise

Gloppen skal ikkje ha ein ukritisk vekst i cruiseanløp, men heller tiltrekke seg rederi og skip som bidreg til verdiskaping lokalt. Det betyr at ein må prioritere skip med høgt betalingsvillige passasjerar, lang liggetid og låg miljøpåverknad.

2.      Minimum liggetid på 12 timar

For å sikre at gjestane både rekk å delta på lokale utflukter og bruke tid i sentrum, må alle skip ha ei minimum liggetid på 12 timar. Dette gjev lokale aktørar moglegheit til å tilby fleire aktivitetar gjennom dagen og skapar betre opplevingar for både turistar og innbyggjarar.

3.      Strenge miljøkrav og berekraftige løysingar

Bruk av Environmental Port Index (EPI) for å avgjere hamneavgifter og stille krav til miljøprofilen til skipa. Ingen bygging av cruisekai før landstraum er på plass, og alle skip skal nytte landstraum for å redusere utslepp i hamn.

4.      Avgrensa passasjertal for å sikre berekraftig kapasitet

·         Med dagens infrastruktur: Maks 1500 passasjerar og eitt skip per dag.

·         Med ny tenderkai: Maks 2500 passasjerar og eitt skip per dag.

·         Med cruisekai: Maks 4000 passasjerar og eitt skip per dag.

5.      Lokal verdiskaping som føresetnad for cruiseanløp

Aktivitetar og utflukter som blir selt om bord på skipa, skal i hovudsak gjennomførast i Gloppen kommune så lenge det ikkje finst cruisekai. Dette sikrar at verdiskapinga skjer lokalt, i staden for at gjestar berre blir transporterte vidare til andre destinasjonar.

6.      Offensiv infrastrukturutvikling på lokale premissar

Det må etablerast ein ny tenderkai med tilhøyrande infrastruktur som toalett og avfallshandtering for å sikre ein god oppleving for gjestar og redusere belastning på sentrum. På lengre sikt kan ei cruisekai vere aktuelt, men berre dersom Nordfjord Havn tek investeringane og at kommunen sikrar klare rammer for bruk.

Gjennomføring og oppfølging

For å implementere denne strategien må Gloppen kommune:

·         Utarbeide ein cruisestrategi som blir ein integrert del av den strategiske næringsplanen.

·         Inngå dialog med lokale næringsaktørar for å utvikle attraktive tilbod som kan skape inntekt og arbeidsplassar.

·         Etablere eit samarbeid med Nordfjord Havn for finansiering og utvikling av infrastruktur på kommunen sine premissar.